Əfsanəvi türk güləşçi İlham Əliyevi dəstəklədi

Azərbaycan və Türkiyənin idman ictimaiyyəti Azərbaycan Prezidenti İlham Əliyevin Şərqi Aralıq dənizində qardaş ölkə ilə Yunanıstan arasındakı gərginlik məsələsində Türkiyəyə göstərdiyi dəstəyi diqqətsiz qoymayıb.

İstiPress-in məlumatına görə, məşhur türkiyəli güləşçi, olimpiya çempionu, 2 qat dünya çempionu, Bakıda keçirilən Avropa Oyunlarının qalibi və dəfələrlə Avropa çempionu o0lmuş Taha Akgül məşhur sərbəst güləş üzrə məşqçi Firdovsi Umudovun "İnstagram"da bununla bağlı paylaşımını şərh edərək yazıb: “İki dövlət, bir millət".

Taha Akgül 2015-ci ildə Bakıda keçirilən Avropa Oyunlarında zəfəri Azərbaycan və Türkiyə bayraqları ilə qeyd etməsi ilə yadda qalıb. 2018-ci ildə Bakıdakı təlim düşərgəsində olarkən Türkiyə ilə Azərbaycan arasındakı qardaşlıqdan da danışan Akgül demişdi: “Bakıya Azərbaycan güləşçiləri ilə məşq etmək üçün gəldik. Deyirik: "İki dövlət, bir millət"! İki ölkənin idmançılarının qələbəsi şərəfinə Türkiyə və Azərbaycan bayraqlarının dalğalanmasını istəyirik. 2015-ci ildə Avropa Oyunlarında qalib gələrək iki bayraq qaldırmışdım. Bizim hər şeyimiz birdir”.